comicteca

Deben estar os cómics na biblioteca?
O cómic é unha ferramenta excelente para fomentar a lectura entre nenos e adultos. Conecta ca aprendizaxe visual. Enriquece o vocabulario, desenvolve a expresión, axuda a reter palabras complexas por asociación, coaxuda á comprensión do relato, fixa a atención, adáptase ao propio ritmo da lectura, mellora a capacidade de síntese, é ideal para a aprendizaxe de idiomas. Estimula a creatividade e desenvolvemento de potentes capacidades na linguaxe artística. Os lectores de cómic teñen mellor vocabulario e nivel de lectura. Os cómics estimulan a imaxinación e o desexo de crear. Facilitan a linguaxe icónica. Reflicten a realidade social dunha época ou un país e desenvolven o sentido crítico ante o mundo que os rodea. Dan a coñecer paixóns humanas, frustracións persoais, sonos, contradicións moi importantes no mundo da ética e da historia. Espertan aos lectores durmidos e desmotivados. Os cómics son o medio ideal para espertar interese pola lectura, cunha parte moi importante de diversión. Medio de mensaxes educativas. Estimulan a explorar outras literaturas. Moitos lectores de cómic chegan a ser ávidos lectores de libros. Enganchan a lectores. Aos lectores e lectoras encántanlle os cómics: esa é a mellor razón para telos.
(C.M. Artacho Orihuela)

A Biblioteca Municipal do Porriño pon en marcha a sección de Comicteca, un servizo que busca darlle o recoñecemento que se merece a este xénero literario-artístico, e descubrir aos seus usuarios esa linguaxe única que o converte nun vehículo narrativo de primeira orde. Dende a biblioteca realízase unha aposta forte pola banda deseñada, que ata ben pouco estivo relegada a xénero de segunda orde. A selección bibliográfica (composta por un fondo fundacional de arredor de 1.000 volumes), ademais de contar con toda a produción en lingua galega da banda deseñada, presenta tamén cunha ampla selección de cómic español, europeo, hispanoamericano, norteamericano e manga xaponés.

O servizo de comicteca presenta dúas seccións, a Sección de Adultos, disposta na sala de consulta e practicable para os/as usuarios maiores de 18 anos, e a Sección Xeral, disposta na Sala Infantil e Xuvenil e aberta a tódolos públicos. Esta clasificación primeira comezará a signatura topográfica das obras, e así as letras que comecen"CA" indican a súa pertenza á Sección de Adultos mentres que "CX" á Sección Xeral.

Unha segunda clasificación divide ás obras segundo a súa procedencia xeográfica. Óptase por empregar este tipo de clasificación porque segundo sexa a súa zona de procedencia ó cómic presenta, de maneira moi xeneralizada, unhas características definitorias. E así poderedes encontrarvos (no caso da Sección Xeral):

- CÓMIC EUROPEO (CXE)
- CÓMIC ESPAÑOL (CXEE)
- CÓMIC GALEGO (CXEG)

- CÓMIC AMERICANO (EE.UU. e Canadá)
• Mainstream (CXAM): trátase, basicamente, dos cómics de superheroes e superheroínas, publicados principalmente polas grandes dúas grandes editoriais Marvel e DC
• Independente (CXAI): cómic máis achegado ao europeo, publicado normalmente por pequenas editoriais onde o autor ten máis liberdade creativa
• Clásico (CXAC): normalmente tiras diarias e suplementos dominicais publicados nos xornais estadounidenses dende principios do século XX.

- CÓMIC XAPONÉS
• Shonen manga (CXMS): manga dirixido principalmente a mozos adolescentes; principalmente son series de acción, ainda que tamén existen as series de humor ou romance desde o punto de vista do home
• Shojo manga (CXMH): manga dirixido principalmente a mozas adolescentes, principalmente son series de amor.
• Seinen e Josei manga (CXME): manga dirixido normalmente á audiencia de maiores de 18 anos; principalmente son series de sexo, política e violencia destacando as historias de samurais

http://biblioporrinocomic.wordpress.com/

O E-Club Virtual de Lectura do Cómic da Biblioteca do Porriño pretende ser un espazo de encontro no que, a través de informacións, recensións e experiencias compartidas entre todos, darémoslle unha volta de torca ao mundo do cómic a partir da comunidade de usuarios da biblioteca porriñesa. Periodicamente engadiremos críticas dunha obra ou serie en concreto que valoraremos coas nosas impresións, apreciacións e opinións a través de comentarios aos post incluidos polo administrador.
Os comentarios serán previamente aprobados polo moderador antes de ser publicados.
As posibilidades deste entorno dixital permiten que non necesitemos estar presentes nun mesmo espazo físico e ao mesmo tempo para facer efectiva a dinámica tradicional dun club de lectura, senón que poderemos participar cando queiramos na crítica aberta ao redor da obra en cuestión. Agardamos a vosa participación activa neste entorno de lectores e autores de cómics para dinamizar a vida deste xénero que ata ben pouco non recibiu todo o recoñecemento que se merece.

Puxemos en marcha a inauguración da comicteca cunha serie de actividades paralelas coas que queriamos impulsar o coñecemento deste mundo bibliográfico na nosa localidade:

- Festa Cosplay de inauguración e Exposicións: "Comicteca do Porriño" e "A nova BD Banda"

- Obradoiro de creación de blogs

- Obradoiro de creación de cómics