actividades — Semana do Libro e a Lectura. VAI DE MEDO...
Do 9 ao 14 de abril na Biblioteca Municipal

“A lectura é un traxe que lle senta ben á alma e faina máis fermosa”
(Xavier, P. Docampo)

A Biblioteca do Porriño, en colaboración coa Asociación Socio-Pedagóxica Galega e a Consellaría de Cultura e Deportes, anuncia a celebración da II edición deste encontro literario, que terá lugar no Porriño entre o 9 e o 14 de abril de 2007.
Nós sabemos que a lectura é unha afección que se transmite fundamentalmente por contaxio e que neste labor ensinantes, nais e pais temos unha responsabilidade decisiva. Esta Semana do Libro e a Lectura nace co ánimo de ser lugar de encontro, espazo no que transmitir habilidades, estratexias para conseguir que nenos e nenas sexan bos lectores pero o máis importante, descubran o pracer de ler. A Semana do Libro e a Lectura trata de ser unha festa da literatura.
Este ano escolleuse un tema que nos presta moito a nen@s e maiores: o MEDO.
Todas e todos lembramos desde moi cativos, personaxes da literatura que nos fixeron pasar momentos realmente malos que recordamos con moito agrado: lobos, xigantes, malvados, pantasmas, monstros…

Actividades abertas ao público - Exposicións permanentes
Obradoiros para nenos e nenas - Actividades co profesorado

ACTIVIDADES ABERTAS AO PÚBLICO

• Luns 9 ás 18:30: INAUGURACIÓN
  QUE MEDO, QUE MEDO!
  Por Galitoon
  Un espectáculo moi visual onde converxen diferentes técnicas: títeres de man, música e contos para os máis pequenos. A través da risa, a inocencia, a frescura, a maxia e os contos todo é posíbel.
  
• Martes 10, O CIRCO DAS PULGAS, 18:00 H
  
• Mércores 11, CONTOS CON ANXO MOURE, 18:00 H
  
• Xoves 12, PAVÍS PAVÓS, 18:00 H
  
• Venres 13, CONTOS CON BENXAMÍN DIÉGUEZ, 18:00 H
  
• Sábado 14, ás 12:00 h: CLAUSURA
  medomedá
  A través da imaxe, da palabra e da música. Como medio empregaremos propostas audiovisuais creadas a partir dos contos de OQO Editora. Unha viaxe a través dos sentidos, levados da man da palabra, tomada da tradición oral chegada de distintas partes do mundo, na que os contos de medo terán un especial protagonismo. Merendaremos con xigantes papóns, e xogaremos cos obxectos máxicos dunha bruxa que regaña os dentes e buscaremos a maneira de saír da cova dun oso a rolos nunha cabaza faladora.
  

EXPOSICIÓNS PERMANENTES

Exposicións de libros cedidos polas editoriais

Ler abre as portas do futuro. E o que podemos atopar entre as liñas dos libros son soños, países, viaxes, liberdade, medo, risas... Haberá lobos, meigas, trasnos ou sacauntos; centos de personaxes da fantasía nestas Semanas de soños e todos os nenos e nenas que collan libros nas mans poderán miralos aos ollos e sentir arrepíos, alivio, tranquilidade... todo é posible.

Exposición de Ilustradoras/es

Podemos completar as imaxes fantásticas que dan vida e expresividade ás historias coas seguintes exposicións:
• Apaga a luz que quero medo: AGPI, Consellería de Cultura, Salón do Libro
• Xogando cos contos: Bernardino Graña
• Historias para ollar: Noemí López
• A historia infinda: Pepe Carreiro
• Lobo feroz: OQO
• O papón: OQO

Exposición de materiais elaborados por alumnos e alumnas.

Os libros e murais fabricados cos soños dos nenos e nenas dos colexios. Soldadiños, peixes, lobos, estrelas que falan, muíños de vento, ratiñas, cabaleiros e moito máis. Son os libros feitos a man. Os libros e os murais artesáns. Os libros das tesoiras, o pegamento e a cartolina de cores. Os libros onde entrarán as cores do arco da vella e da paisaxe de Galiza. Os vosos libros e murais que por uns días serán de todos e de todas.

“ Horario de visitas ás exposicións: durante a semana permanecerán abertas de 10 a 14 h. para os centros de ensino e de 17:00 a 20:00 para o público en xeral”

OBRADOIROS PARA NENAS E NENOS
(actividades concertadas cos centros de ensino)

Martes 10 (3º PRIMARIA)

Obradoiro de Música e Romances con: ANTÓN CASTRO

Neste obradoiro dirixido ao alumnado de 3º Primaria farase un percorrido polo cancioneiro da música tradicional galega acompañado con instrumentos de uso cotián e unha visión do traballo dos ceg@s no uso dos romances da música de rúa.

Obradoiro de animación á lectura con: SABELA GAGO

Actividade dirixida ao alumnado de 3º de Primaria co obxectivo de achegalos á maxia da lectura e facelos vivir e gozar das aventuras agochadas entre as páxinas dos libros.

Mércores 11 (5º PRIMARIA)

Obradoiro de contacontos con: ANXO MOURE

Porque os contos son relatos que collen vida a través dos narradores e porque nos fan soñar e non custan nada, por iso lle damos vida aos contos.

Obradoiro de Ilustración con: NOEMÍ LÓPEZ

Actividade dirixida ao alumnado 5º Primaria, onde se resaltará a importancia da imaxe na literatura infantil, onde se dá unha fusión co texto, formando un todo no que as dúas partes se apoian conformando o significado da historia.

Xoves 12 (1º PRIMARIA)

Obradoiro de ilustración con: PEPE CARREIRO

Porque ilustrar é un arte e porque as imaxes reflicten a escrita do conto, por iso un obradoiro de ilustración cuns dos personaxes máis queridos polos nenos e nenas: Os Bolechas

Obradoiro de ilustración con: ANXO FARIÑA

Actividade dirixida ao alumnado de 1º de Primaria. Neste obradoiro o ilustrador acompañará ao alumnado no percorrido de achegamento ao libro e os seus debuxos facilitaranlles o camiño.

Venres 13 (1º ESO)

Obradoiro de teatro e expresión corporal con: NEKANE FERNÁNDEZ

Desenvolver un dos aspectos menos traballados na escola : o afectivo, os sentimentos, a intuición e a creatividade a través da expresión corporal e do xogo. O xogo é saudábel. Despexa a mente da cotidianeidade, fainos estar nunha situación distendida, relaxa, distrae, ensina, une.

Obradoiro de ilustración con: JOSÉ TOMÁS

As ilustracións poden ser unha forma de narrar, de contar historias integrando a imaxe e o texto de xeito complementario.

ACTIVIDADES CO PROFESORADO
DE LUNS A VENRES DE 18:00 A 20:30 H.
“Solicitada a homologación á Consellaría de Educación por 10 horas lectivas”

• Martes 10, de 18:00 a 20:30 h

  Obradoiro de Música e Romances
  ANTÓN CASTRO (Mestre e músico)
  

• Mércores 11, de 18:00 a 20:30 h

  Obradoiro de poesía
  ANTONIO GARCIA TEIJEIRO (Escritor)
  

• Xoves 12, de 18:00 a 20:30 h.

  Obradoiro de Teatro e expresión corporal
  NEKANE FERNÁNDEZ (Actriz e psicóloga)
  

• Venres 13 de 18:00 a 20:30

  Obradoiro de escrita creativa
  AGUSTÍN FERNÁNDEZ PAZ ( Escritor)

“PARA INSCRIBIRSE NO CURSO DO PROFESORADO E NOS OBRADOIROS DO ALUMNADO”
AS-PG: informacion@as-pg.com
981-278259
A matrícula no curso do profesorado será por rigorosa orde de inscrición até encher prazas